АНУ-ЫН ХАМГИЙН ТОМ НҮҮРС ҮЙЛДВЭРЛЭГЧ КОМПАНИ НАРНЫ ЭРЧИМ ХҮЧИЙГ АШИГЛАЖ ЭХЭЛЛЭЭ

АНУ-ын Сент-Луис хотод төвтэй Пибоди Энержи Корпорац сэргээгдэх эрчим хүчний зориулалтаар өмнө нь нүүрсний уурхайн үйл ажиллагаа явуулж байсан газар болон хүрээлэн буй орчныг хөгжүүлж эхлээд байна.

Тодруулж хэлбэл, Пийбоди Энержи Корпорац нь нарны эрчим хүчний төслүүдийг хэрэгжүүлэх зорилгоор хөрөнгө оруулалтын хоёр фирмтэй хамтран “R3 Renewables” төсөл хэрэгжүүлж эхэлснээ өнгөрсөн мягмар гарагт /2022.03.08/ зарлалаа. Төсөл хэрэгжиж эхэлснээр ирэх таван жилийн хугацаанд 3.3 Гигаватт (ГВт) нарны эрчим хүч буюу 2 сая орчим байшинг эрчим хүчээр хангахад хүрэлцэхүйц, 1.6 ГВт батарейны багтаамжийг бий болгох аж. “R3 Renewables” төсөл нь Индиана, Иллинойс мужид томоохон газар нутгуудад хэрэгжих юм. Пийбоди Энержи Корпорац нь 140 жилийн туршлагатай, Австралийн Нью Саут Уэльс болон АНУ-ын Вайоминг, Алабама, Индиана, Нью Мексико мужуудад үйл ажиллагаа явуулж байна.

2020 онд АНУ-ын цахилгаан эрчим хүчний 21 орчим хувийг салхи, усан цахилгаан, нар, биомасс, газрын гүний дулаан зэрэг сэргээгдэх эрчим хүчний эх үүсвэрүүд хангажээ.

Нэмж мэдээлэхэд, АНУ-ын цаг уурын өөрчлөлттэй тэмцэх төлөвлөгөөнд чулуужсан түлшнээс татгалзаж, 2035 он гэхэд цэвэр эрчим хүчний салбарыг бий болгож, 2050 он гэхэд утаагүй эдийн засгийг бүтээх асуудал тусгагдсан байна.

 

Эх сурвалж : www.independent.co.uk